أغنية..مثل هاي

كانت تستنى الأمباطية تتملى..كانت بردانة، ونايمة عتختها..عطرف التخت. قبل بلحظات سمعت إنو صاحبها اللي أكبر منها ب 7 سنين اللي تركها قبل كم شهر..خطب وحدة ثانية. كانت دايماً تفكر إنو العلاقة القوية اللي بيناتهن رح تخلص بإنها تكون معو ويتجوزوا بس هو ولا مرة كان بدو هاد الإشي..لما سمعت الخبر عن الخطبة هاي كانت أسوأ لحظة بحياتها. حسّت وقتها إنها بالحضيض من ناحية عاطفية ونفسية، حسّت إنها وحيدة ومش عارفة إيش تعمل. قررت تكتبلو أغنية اللي فيها تعبر عن إنو بالرغم من اللي صار بيناتهن..هو كان أهم إنسان بحياتها وقضّت معو أحلى سنتين ونص بحياتها.. كل هاد اللي حستو كتبتو بالأغنية..بعد مكتبت الأغنية حسّت بحرية..كل مشاعرها الإيجابية جمعتهن بأغنية وحدة...بعد مكتبت الأغنية حسّت إنها رح تكون تدور عليه كمان 15 سنة تقريباً لما يصير عمرها 40..وبس يكون بدها تتطمن إنو مبسوط، إنو مرتو حلوة ومليحة، إنو ولادو متعلمين ومأدبين.. يمكن هاد الإشي بخوفها للمدى البعيد بس هاي المعاني اللي بتحملها الأغنية..مكنتش متوقعة إنو هاي الأغنية تكون أنجح أغنية كتبتها..الأغنية اللي رح تنشهر بسببها..كانت بدها تكتب أغنية متواضعة أكثر..مش رح تكتب هيك أغنية كمان مرة بحياتها.

هاي القصة مش من خيالي..هاي القصة حقيقية، والصبية بهاي القصة إسمها أديل (Adele)..والأغنية إسمها Someone Like You.. :)
بنفع إسا نسمع الأغنية (مع ترجمة للعربي).

آه..أديل الصبية اللي عمرها 23 سنة، من أنجح المغنيات البريطانيات بالتاريخ، المغنية اللي جسمها الملان وشكلها المش "مثالي" مكنش إلو جزء بنجاحها..المغنية المدمنة عالكحول..اللي طبقات صوتها مع أنغام البيانو ممكن يتعبو القلب ويداعبو الروح بنفس الوقت.
أغلب الناس اللي بعرفهن حبوا الأغنية، الأغنية رائعة..أول مرة سمعتها كانت لما صديقة إلي قلتلي أفوت أشوف وين الشاب الجديد اللي عم تبلّش تحكي معو حطلها لايك..هناك شفتو لأول مرة..وسمعت الأغنية لأول مرة..قلت لحالي معقول العلاقات بتبلّش بهيك أغنية؟ ممكن كان القصد إنو.. محظوظ لأنو كنت أدوّر ولاقيت Someone Like You...بالنهاي.. هاي العلاقة أو "العلاقة" موصلتش عمحل. وإنتهت.
دايماً بنفع نربط الأغنية بحياتنا الخاصة..ونلعب بالكلمات عشان تتلائم مع حياتنا العاطفية 100%..بس بضل القالب هو الأهم. عفكرة اليوم شفت صبية بالفيسبوك حاطّة فوق الأغنية كلمات أغنية كيفك إنتَ.. :)

بالنسبة إلي..أنا كثير حبيت الأغنية..لما أشتاق للي كانت تحبني وأحبها..والإشي عم بصير كثير..بصير أفكر إنو فش إشي إسمو تلاقي حدا مثلي، أو أنا ألاقي حدا مثلها..مش رح يكون مثلنا.. ممكن نعيش قصص حب جديدة ونكمل بحياتنا..أو "نكمل" بحياتنا.. :) بس فش ولا علاقة منعيشها بتشبه الثانية..ولا حب بشبه حب جديد..دايماً رح يكون لكل حدا حبيناه محل خاص بقلبنا حتى لو صغير اللي الحب الجديد مش رح يتعدى عليه ويشغلو لهالمحل..بالنهاية..أنا مثل أديل.. بتمنالك كلشي حلو، بفكر إنك كنتي أكثر وحدة حبتني بحياتي..وعشت معها أحلى لحظات.. وبتمنى لما يصير عمري 40 أدور عليكي بس عشان أتطمن إنك مبسوطة بحياتك..زي معم بعمل كل يوم. وزي مبدها تعمل أديل.
وعفكرة لما زياد كتب أغنية صباح ومسا وكتب هاي الجملة: "في ناس كتير لكن بصير ما في غيرو" كان قاصد يكون آخرها نقطة. ما في Someone Like You.

بتمنالكو أسبوع سعيد كلو حب وأمل.